పాక్‌ బ్యాటర్లకు చుక్కలు చూపించిన హాంగ్‌కాంగ్‌ బౌలర్లు

ఏషియన్‌ గేమ్స్‌ 2023లో పసికూన హాంగ్‌కాంగ్‌ పటిష్టమైన పాకిస్తాన్‌కు చుక్కలు చూపించింది. హాంగ్‌కాంగ్‌ మ్యాచ్‌ అయితే గెలవలేపోయింది కాని, పాక్‌ బ్యాటింగ్‌ను కకావికలం చేసి నామమాత్రపు స్కోర్‌కే పరిమితం చేసింది. 8.5 ఓవర్లలో కేవలం 54 పరుగులకే సగం​ పాక్‌ వికెట్లు పడగొట్టిన హాంగ్‌కాంగ్‌ బౌలర్లు.. ఆ తర్వాత పాక్‌ లోయర్‌ ఆర్డర్‌ బ్యాటర్‌ ఆమెర్‌ జమాల్‌ను (16 బంతుల్లో 41; 2 ఫోర్లు, 4 సిక్సర్లు) కట్టడి చేయడంలో విఫలం కావడంతో పాక్‌ ఓ మోస్తరు చేయగలిగింది. అయితే ఛేదనలో బ్యాటర్లు చేతులెత్తేయడంతో హాంగ్‌కాంగ్‌ ఓటమిపాలైంది. ఈ గెలుపుతో పాక్‌ సెమీ ఫైనల్‌కు చేరుకోగా.. హాంగ్‌కాంగ్‌ ఇంటిదారి పట్టింది. ఇవాళ ఉదయం 11:30 గంటలకు ప్రారంభమైన క్వార్టర్‌ ఫైనల్‌-2లో టాస్‌ ఓడి హాంగ్‌కాంగ్‌ ఆహ్వానం మేరకు తొలుత బ్యాటింగ్‌ చేసిన పాక్‌.. ఇన్నింగ్స్‌ ఆరంభంలో కష్టాల్లో పడినప్పటికీ, ఆతర్వాత తేరుకుని నిర్ణీత 20 ఓవర్లలో 160 పరుగులకు ఆలౌటైంది. పాక్‌కు ఆమెర్‌ జమాల్‌ (41) ఆదుకోగా.. ఆసిఫ్‌ అలీ (25), అరాఫత్‌ మిన్హాస్‌ (25), ఒమర్‌ యూసుఫ్‌ (21), ఖుష్దిల్‌ (13), రోహైల్‌ నజీర్‌ (13), ఖాసిమ్‌ అక్రమ్‌ (12) రెండంకెల స్కోర్లు చేశారు. హాంగ్‌కాంగ్‌ బౌలర్లలో ఆయేష్‌ శుక్లా (4-0-49-4) పాక్‌ టాపార్డర్‌ను గడగడలాడించగా.. మెహమ్మద్‌ గజన్ఫార్‌ (4-0-26-3), అనాస్‌ ఖాన్‌ (3-0-18-2), ఎహసాన్‌ ఖాన్‌ (4-0-28-1) వికెట్లు తీశారు